បទល្មើសក្នុងខែវិច្ឆិកា មាន៥៤ករណី កម្លាំងសមត្ថកិច្ចបង្ក្រាបបាន៥២ករណី
09-December-2019 | ដោយ ពលមនសិការ
ភ្នំពេញ៖ គណៈបញ្ជាការដឹកនាំអនុវត្តផែនការសកម្មភាព បង្ការ ទប់ស្កាត់ បង្ក្រាបអំពើលួច ឆក់ នៅរាជធានីភ្នំពេញ នៃអគ្គស្នងការដ្ឋាននគរបាលជាតិ នៅព្រឹកថ្ងទី០៩ ខែធ្នូ ឆ្នាំ២០១៩នេះ បានបើកកិច្ចប្រជុំវាយតម្លៃសភាពការណ៍បទល្មើស លួច ឆក់ ប្រចាំខែវិច្ឆិកា និងលើកទិសដៅបន្ដ។
កិច្ចប្រជុំនេះដឹកនាំដោយ ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងមានការចូលរួមពី អនុប្រធានសេនាធិការ, ប្រធាននាយកដ្ឋាននគរបាលព្រហ្មទណ្ឌ, ប្រធាននាយកដ្ឋាននគរបាលទេសចរណ៍, ប្រធាននាយកដ្ឋាននគរបាលបច្ចេកទេស និងវិទ្យាសាស្ដ្រ, អនុប្រធាននាយកដ្ឋាននគរបាលព្រហ្មទណ្ម, ស្នងការរងរាជធានីភ្នំពេញទទួលផែនព្រហ្មទណ្ឌ, នាយការិយាល័យជំនាញ និងអធិការខណ្ឌទាំង១៤។
យោងតាមរបាយការណ៍របស់ លោកឧត្តមសេនីយ៍ទោ ស៊ុយ សុគន្ធា ប្រធានលេខាធិការដ្ឋាន នៃគណៈបញ្ជាការដឹកនាំការអនុវត្តផែនការសកម្មភាព បង្ការ ទប់ស្កាត់ និងបង្ក្រាបអំពើលួច ឆក់ ក្នុងរាជធានីភ្នំពេញ បានឲ្យដឹងថា សម្រាប់ខែវិច្ឆិកា ដោយមានការខិតខំប្រឹងប្រែងពីកងកម្លាំងគ្រប់អង្គភាពទាំងអស់ បានចំនួន៥២ករណី ចាប់បានជនសង្ស័យ៧០នាក់ ស្មើ៩៦ភាគ។
ក្នុងនោះ បទល្មើសលួច ២៦ករណី លើ២៨ករណី, បទល្មើសឆក់ ២៦ករណី លើ២៦ករណី។ ដោយឡែក ករណីនៅសេសសល់ មានចំនួន២ករណី គឺខណ្ឌជ្រោយចង្វា ១ករណី និងខណ្ឌកំបូល ១ករណី។ ជាការកត់សម្គាល់ ជនសង្ស័យបង្ក្រាបបានក្រោយពីធ្វើតេស្ដធ្លាប់ប្រើសារធាតុញៀន មាន៥៣នាក់ ស្មើនឹង៧៦ភាគរយ។
ថ្លែងក្នុងឱកាសនោះ ឯកឧត្តម នាយឧត្តមសេនីយ៍ ហ៊ឹម យ៉ាន បានថ្លែងការកោតសរសើរដល់កម្លាំងជំនាញទាំងអស់ ដែលបានខិតខំរួមគ្នាបង្ការ ទប់ស្កាត់ និងបង្ក្រាបទទួលបានលទ្ធផលខ្ពស់ និងបានដាក់បទបញ្ជាឲ្យកងកម្លាំងពាក់ព័ន្ធ និងតាមបណ្ដាខណ្ឌត្រូវបង្កើនការផ្សព្វផ្សាយអប់រំ ដល់ប្រជាពលរដ្ឋ និងភ្ញៀវទេសចរបរទេស ឲ្យប្រុងប្រយ័ត្នរក្សាទ្រព្យសម្បត្តិ ការចូលរួមរបស់ប្រជាពលរដ្ឋក្នុងការវែកមុខ មុខសញ្ញាសង្ស័យជាដើម។
លើសពីនេះ ឯកឧត្តម នាយឧត្តមសេនីយ៍ អគ្គស្នងការរង ក៏បានជំរុញឲ្យខិតខំពង្រឹងការងារគ្រប់គ្រងមុខសញ្ញា និងនីតិវិធីកសាងសំណុំរឿង ដើម្បីមានភ័ស្ដុតាងរឹងមាំដាក់បន្ទុកផ្ដន្ទាទោសឲ្យបានកម្រិតខ្ពស់ (បទឧក្រិដ្ឋ) ស្របតាមក្រមព្រហ្មទណ្ឌ និងត្រូវពិនិត្យឡើងវិញករណីមុខសញ្ញាឆក់ ដែលត្រូវបានដោះលែង ហើយធ្វើសកម្មភាពឡើងវិញ ដើម្បីរាយការណ៍ជូនថ្នាក់ដឹកនាំមានវិធានការបន្ដ។
អ្វីដែល ឯកឧត្តម នាយឧត្តមសេនីយ៍ ហ៊ឹម យ៉ាន បានសង្កត់ធ្ងន់ដល់កងកម្លាំងជំនាញព្រហ្មទណ្ឌនោះ គឺបង្កើនការល្បាតប្រទាក់ក្រឡាក្នុងភូមិសាស្ដ្រងាយរងគ្រោះ ដើម្បីបង្ការ និងឈានដល់ការបង្ក្រាបជនដៃដល់ដែលប្រព្រឹត្តបទល្មើសយកមកផ្ដន្ទាទោសតាមផ្លូវច្បាប់ ៕
ចំនួនអ្នកទស្សនា
- ថ្ងៃនេះ18591
- ម្សិលមិញ15681
- សប្តាហ៍នេះ77431
- ខែនេះ99311
- ឆ្នាំនេះ99311
- សរុប20541767